viernes, 28 de mayo de 2010

Que teas bonos suaños. Mª Teresa González



Que teas bonos suaños,
anque nun seya comigu
nin al mio llau.
Que los dioses te seyan favoratibles
p'algamar l'abondanza
na sema perguapa del amor.
Qu'atopes nel camín la meyor sienda
palos tos pies lixeros.
Qu'hebia fueyes al to pasu
que peñeren esi sol tercu
qu'ambura nes mañanes guapes
dempués de la rosada llenta del riscar.
Que pueas algamar el don divinu
del asombru
ante los fechos,
anque paezan neñures.
Que te dexe ñiciu
tolo que na piel
el tiempo va posando.
Que los sentíos aliten vivos
comu la flama encesa,
y pueas amar,
gociar,
tastiar...
y cuando toque sofrir, teas valor.
Sapienza a les tos manes
nel adeprendimientu amorosu,
que reclama les beyures del gociu.

Ten siempre
una sonrisa guapa
una pallabra d'aliendu
p'aquéllos que nun tienen tanta suerte,
y memoria
pa que, de xemes en cuandu,
asoleyes pa mi una alcordanza.

1 comentario:

  1. Gana mucho más recitado, es lo que tiene el asturianu, que oralmente, gana.

    ResponderEliminar